पोवारी को गीत जब वोठ पर आये । पोवारीमा हाशी खुशी बातचीत होये ।। असो प्रसंग पोवारी बोलीसाती गौरवशाली प्रसंग रहे असो मोला लगसे. आमरी पोवारी मायबोली बहूतच विनम्र अना मधूर से. पोवारी बोली छत्तीस कुऱ्या पोवार समाज की पहचान आय. का बडीमाय कमी सेस? का बडोभाऊ कसो सेस? का शायनीमाय कमी सेस? असा पोवारी बोलीका मधूर बोल' दुय दिलमा आपलोपनको भाव पैदा करनकी अना आपलोपनकी तार जोडनकी ताकत रखसेत. पोवारी बोली पोवार समाज की मानपान अना शान आय. पोवारी बोलीकं प्रचार प्रसार साती अना पोवारी जनकं मनमा नवचेतना फुकनसाती पोवारी आराधना यव कविता संग्रह प्रकाशित करनकं घनी मोला बहूतच खुशी होय रही से. पोवारी बोली को प्रचार प्रसार करनो रहेतं लोक साहित्यकं माध्यमलका साजरो होय शिकसे अशी मोरी मनशा से. यकं साती पोवारी गीत, पोवारीमा भजन, पोवारीमा आरती अना पोवारीमा बालगीत पोवार भाई बहनकं वोठपर विराजमान होये पायजे. यनं माध्यमलका पोवारी बोलीको बोलबाला होये असो मोला लगसे. कोनतबी संस्कृतीकी पहचान वकी चालीरीती, वकी बोली भाषा, भजन, लोकगीत, आरती, अना भावगीत लका होसे. मरं बी संस्कृतीकी पहचान भजन, गीत, आरती लगा जरूर होये असो मोला लगसे. पोवार समाज का भाई बईन जब पोवारी मां आरती कहेत, पोवारीमा गीत कहेत तबं पोवारी बोली को महत्व आपोआपोच बड़े असो मोला लगसे. पोवारी बोली को डंका बजावनसाती पोवारी आराधना यव कवितासंग्रह प्रकाशित कर रही सेव. समाज परिवर्तनशील से. आमरं पोवार समाज का लोक पयले पढ्या लिख्या नोहता तरी पोवारी बोली घर घर मा हाशी खुशी लक नांदत होती. आबं शिक्षा क्षेत्र मा प्रगती होय रही से अना पोवारीमा बोलचाल को प्रमाण कम होय रही से. या जरासी विचार करनलाईक बात से. आबं पोवारीमा आर्केस्ट्रा, कथालेखन अना गीत लेखन असा कार्यक्रम गावखेडामा अना शहरमा होय रह्या सेत. पोवारी मायबोलीक भलोसाती एक आशाको किरण से. पोवारी मायबोलीकं भलोसाती पोवारी बोली साहित्यकं क्षेत्रमा राज करे पायजे असी मोरी मनोकामना से. पोवारी आराधना यनं कविता संग्रहमा श्री गणेश स्तुती, गणपतीकी आरती, गढ़कालिका माताकी आरती, भगवान कृष्णकी आरती, तुरसी माताकी आरती, शिवजीकी आरती, प्रभू श्रीरामजीकी आरती, हनुमानजीकी आरती, सरस्वती माताकी आरती, दुर्गा माताकी आरती, राजाभोज प्रार्थना, अभंग, भजन अना बालगीत असी ६२ कविता लिखी सेव. यनं कवितासंग्रहकं माध्यमलका पोवारी ज्ञान रुपी खाजोकी बिवडी भरकन पोवार समाजला बाटनकी कोशिस करी सेव. ✍️शेखराम परसराम येड़ेकर