തികച്ചും വ്യത്യസ്തമായ ഇരുപത്തിയഞ്ച് കഥകളുടെ സമാഹാരമാണ് പാര്‍ത്ഥന്‍റെ വീട് എന്ന ഈ പുസ്തകം. നിരവധി സാഹിത്യപുരസ്കാരങ്ങള്‍ കരസ്ഥമാക്കിയ ശ്രീമതി ഗിരിജാ വാര്യരുടെ രചനാവൈഭവം പ്രകടമാക്കുന്ന ഈ കഥകള്‍ എല്ലാം തന്നെ വിവിധ മാസികകളില്‍ പ്രസിദ്ധീകരിച്ചവയാണ്. ഗിരിജ ടീച്ചറുടെ അഞ്ചാമത്തെ പുസ്തകമാണ് ഇത്. ഈ കഥകള്‍ എല്ലാം തന്നെ ടീച്ചറുടെ അനുഭവങ്ങളുടെ തീച്ചൂളകളില്‍ പാകപ്പെടുത്തി എടുത്തവയാണെന്ന് ഇരുത്തംവന്ന വായനയിലൂടെ മാനസിലാകും. എഴുത്തിന്‍റെ പരിചയസമ്പന്നത കഥകളില്‍ ഉടനീളം ദൃശ്യമാണ്. ടീച്ചറുടെ കഥകളുടെ തലക്കെട്ടുകളുടെ തിരഞ്ഞെടുപ്പും കഥാതന്തുവിന്‍റെ കനവും കഥകള്‍ അണിയിച്ചൊരുക്കുന്ന ചാരുതയും മുന്‍നിരകഥാകൃത്തുക്കളോട് കിടപിടിക്കുന്നതാണെന്ന് നിസംശയം പറയാം.